ЗАМ, ТЭЭВРИЙН САЛБАРЫН ЗАЛУУЧУУДЫН ЗӨВЛӨГӨӨН АМЖИЛТТАЙ БОЛЖ ӨНДӨРЛӨЛӨӨ
  • 2022.06.05

Зам, тээврийн салбарын залуучуудын зөвлөгөөн зохион байгуулагдаж Асуудалд шийдэл байдаг уриан дор нэгдлээ.  Хэлэлцүүлэг, зөвлөгөөнд Зам, тээврийн хөгжлийн төв ТӨҮГ-ын удирдлага, залуучууд оролцов.

Тус зөвлөгөөн хоёр гол үйл явдлаас бүрдэв. Эхнийх нь Зам тээврийн салбарын залуучуудыг хөгжүүлэх, салбарын хөгжлийн бодлогод залуучуудын оролцоог нэмэгдүүлэх, залуучуудын бүтээлч сэтгэлгээг дэмжих замаар байгууллагын хөгжлийг түүчээлэхэд дэмжлэг үзүүлэх, зам тээврийн салбарын залуучуудыг эвлэлдэн нэгдэх, хөгжүүлэх зорилгоор Монгол Улсын Засгийн газрын гишүүн, Зам, тээврийн хөгжлийн сайд Л.Халтар, Зам тээврийн залуучуудын хөгжлийн зам зөвлөл хооронд хамтран ажиллах санамж бичиг байгууллаа.

Дараагийн үйл явдал нь  “Автотээврийн салбарын цахим хөгжил”, “Төмөр замын бүтээн байгуулалт ба залуучууд”, “Автозамын шинэчлэл хөгжил”, “Иргэний нисэхийн салбарын хүний нөөцийн бодлого”, “Залуусын хөгжил ба цахим шилжилт” сэдвүүдийг хөндөж холбогдох газрын удирдлага, мэргэжилтнүүд оролцон тулгамдаж буй асуудал, шийдвэрлэх арга замын талаар санал солилцож гарсан шийдэл, дүгнэлтээ Төрийн нарийн бичгийн даргад гардуулан өгөв.

Энэхүү хэлэлцүүлэг, зөвлөгөөний үеэр Зам, тээврийн хөгжлийн төв болон салбарын бусад байгууллагууд өөрсдийн танилцуулгыг байршуулж, үйл ажиллагаа, хүний нөөцийн чиглэлээр зочид төлөөлөгчид болон залуу үеийнхэнд мэдээлэл хүргэлээ.