“ОйлГОЁ-ХҮНдэлье” аян АМЖИЛТТАЙ зохион байгуулагджээ.
  • 2020.01.02
“Ойлгоё Хүндэлье” гэсэн үг хэдийнээ бидний танил болжээ. Учир нь гэр бүлийн болон охид, эмэгтэйчүүдийн хүчирхийллийг эсрэг энэхүү аяныг Монгол Улсад Гэмт хэргээс урьдчилан сэргийлэх ажлыг зохицуулах зөвлөл, Хөдөлмөр, нийгмийн хамгааллын яам, Цагдаагийн ерөнхий газар, НҮБ-ын Хүн амын сан, Швейцарийн хөгжлийн агентлаг, Жендэрийн үндэсний хороо, Хүчирхийллийн эсрэг үндэсний төв болон “Монгол цэргийн нэгдсэн холбоо” ТББ зэрэг төрийн болон төрийн бус байгууллага хамтран улсын хэмжээнд зохион байгуулсан.

 

Дээрх арга хэмжээг бие бүрэлдэхүүний дийлэнх нь эрчүүд ажилладаг Үндэсний аюулгүй байдлыг хангах тусгайлсан чиг үүрэгтэй байгууллага болох зэвсэгт хүчин, онцгой байдал, хил хамгаалах, дотоодын цэрэг, шүүхийн шийдвэр гүйцэтгэх зэрэг олон байгууллага дуу хоолойгоо нэгтгэн аянд нэгдэж, спорт, урлаг соёлын олны танил эрхэмүүд олон нийтийг уриалан дэмжиж, хэвлэл мэдээллийн хэрэгслүүд хамтран ажилласан.

 

Гэр бүлийн хүчирхийллийн талаарх ойлголт, хор уршиг, шалтгаан нөхцөл, хууль эрх зүйн талаарх иргэдийн мэдлэгийг дээшлүүлэх, улмаар гэр бүлийн хүчирхийллийн гэмт хэрэг, зөрчлийг бууруулах зорилготой энэхүү аяны хүрээнд цагдаагийн байгууллагаас гэр бүлийн эерэг харилцаа, хандлага төлөвшүүлэх, түгээх агуулгатай постер, видео шторк, зорилтот мэдээ, мэдээллүүдийг бэлтгэн хүргэснийг нийтийн цахим сүлжээнд давхардсан тоогоор 4.9 сая гаруй хүн үзэж, 59.2 гаруй мянган хүн бусадтай хуваалцжээ.

 

Арга хэмжээний хугацаанд гэр бүлийн хүчирхийллийн гэмт хэрэг, зөрчил өмнөх оны мөн үеэс өссөн нь сайн үзүүлэлт гэсэн.

 

Өөрөөр хэлбэл цоожтой хаалганы цаана нуугдмал хэлбэрээр үйлдэгддэг, хохирогч өөрөө эсхүл хүчирхийлэл үйлдэгдсэнийг мэдсэн хөндлөнгийн хэн нэгний мэдээллээр илэрдэг энэ төрлийн хэрэг, зөрчил өссөн нь иргэдийн хүчирхийллийн талаар ойлголт дээшилж, хүчирхийлэлгүй нийгмийн төлөө хамтарч чадаж байгаатай холбон үзэж байна.

 

Энэ арга хэмжээний үр дүнд нэг ч гэсэн хүчирхийлэгчийн зан үйл өөрчлөгдөж, хүчирхийллийн үйлдэлээс татгалзсан, эхнэр, нөхөр харилцан бие биенээ ойлгон, хүндэтгэж, гэр бүлийн эерэг харилцаа, хандлагыг бий болгосон бол амжилт юм.

 

Урьдчилан сэргийлэх ажил бол гарт баригдахгүй, нүдэнд харагдахгүй хирнээ тодорхой хугацааны дараа хүний зан үйлд нөлөөлж, бусдыг гэмт санаа бодлоос нь татгалзуулах, зөв үлгэр дуурайл үзүүлэх нөхцөлийг буй болгож, нийгэмд зөв хэвшил, эерэг хандлага тогтоох зорилгыг агуулдаг олон талт ажил байдаг .

 

“Ойлгоё Хүндэлье” арга хэмжээний дараа бидэнд юу үлдэв? Төрийн болон төрийн бус байгууллага, иргэд гэр бүлийн хүчирхийллийн эсрэг нэгдэж чадлаа, цаашид хүчирхийлэлгүй нийгмийг бий болгоход хүн бүрийн хүчин чармайлт чухал, гэр бүлийн хүчирхийлэлтэй нийтээрээ тэмцэж чадвал бодит үр дүнд хүрч чадна гэдгийг харууллаа.

 

Цаашид цагдаагийн болон бусад байгууллагаас зохион байгуулж байгаа гэмт хэрэг, зөрчлөөс урьдчилан сэргийлэх аливаа ажил, арга хэмжээг иргэд, олон нийт өргөнөөр дэмжин оролцож, гэмт хэрэг, зөрчилгүй, эрүүл, аюулгүй орчинд аж төрөх нөхцөлийг бүрдүүлэх нь чухал байгааг онцолж байна.