Төрийн өмчит болон төрийн өмчийн оролцоотой компани, төрийн өмчит үйлдвэрийн газруудыг хамарсан “Төрийн өмчийн менежмент ба нийгмийн хариуцлага 2018” өдөрлөгт  Зам, тээврийн хөгжлийн төвийн хамт олон амжилттай оролцож, үйл ажиллагаагаа олон нийтэд сурталчиллаа.

Өдөрлөгийн нээлтийн арга хэмжээнд Монгол Улсын ерөнхий сайд У.Хүрэлсүх болон Зам, тээврийн хөгжлийн сайд Ж.Бат-Эрдэнэ нар оролцож, компаниудын үйл ажиллагаатай танилцах үеэр “Зам, тээврийн хөгжлийн төв” ТӨҮГ-ын захирал Р.Буд төвийн болон авто замын засвар арчлалтын компаниудын үйл ажиллагааны талаар танилцууллаа.

Өдөрлөгийн үеэр Сүхбаатарын талбайд цугласан ард иргэдэд Зам, тээврийн хөгжлийн төвийн үйл ажиллагааны талаар товч танилцуулга хүргэж, асуулт хариултын тэмцээн болон азын сугалаа зохион байгуулж, 6 иргэнийг шагналаа.

Мөн 2017 онд эдийн засгийн үзүүлэлт, зорилтот түвшин, гэрээний үүргээ амжилттай биелүүлж ажилласан шилдэг захирлаар авто замын засвар арчлалтын компаниудаас “Архангай АЗЗА” ТӨХК-ийн захирал Ю.Ганзориг, “Төв АЗЗА” ТӨХК-ийн захирал М.Ганбаатар, “Хархорин АЗЗА” ТӨХК-ийн захирал Ж.Бадрах нар шалгарлаа.

Төрийн өмчийн бодлого зохицуулалтын газрын дарга Ц.Ням-Осор: 2017 онд төрийн өмчит болон төрийн өмчийн оролцоотой хуулийн этгээдийн 72 хувь нь ашигтай ажиллаж, өр зээлээ 300,0 тэрбум төгрөгөөр бууруулсан юм. 859 тэрбум төгрөгийн цэвэр ашигтай ажиллаж, ашиг 27 хувиар нэмэгдсэн  нь эдийн засгийн үр ашиг санхүүгийн чадавх сайжирсныг харуулж байна.

Төрийн өмчит хуулийн этгээдийн 2017 оны эдийн засгийн үндсэн үзүүлэлт, зорилтот түвшинг батлахдаа хөрөнгө оруулалтыг оновчтой хийх чиглэл баримталж, үр ашиггүй зардлыг хязгаарлаж, компанийн удирдлагын цалинг үе шаттайгаар бууруулан, тендерийг ил тод, нээлттэй явуулах зорилгоор цахим хэлбэрт шилжүүлсэн ба захиралтай байгуулах контрактын гэрээг 1 жилээр хийж, хугацаатай албан даалгавар өгч гүйцэтгэлд хяналт тавьж ажилласан нь компаниуд ашигтай ажиллахад эерэгээр нөлөөлсөн байна.

"Архангай АЗЗА" ТӨХК, "Хархорин АЗЗА" ТӨХК, "Төв АЗЗА" ТӨХК