Захирлын мэндчилгээ
“Зам, тээврийн хөгжлийн төв” Төрийн өмчит үйлдвэрийн газрын вэб сайтад зочилж буй эрхэм хэрэглэгч, уншигч танд энэ өдрийн мэндийг дэвшүүлье. Авто замын салбар үүсч хөгжсөн тэртээх он жилүүдээс эхлэн өнөөг хүрэх түүхэн үйл явдлын нэгээхэн хэсэг болж, Монголын авто замын их бүтээн байгуулалтыг бичилцэж яваа байгууллага, хамт олныхоо өмнөөс мэндчилж байгаадаа баяртай байна.
“Зам, тээврийн хөгжлийн төв” Төрийн өмчит үйлдвэрийн газар нь Монгол улсын Засгийн газар, Зам, тээврийн хөгжлийн яамны бодлого, чиглэлийг хэрэгжүүлэгч байгууллага юм. Манай байгууллага “Авто замын тухай хууль” /шинэчилсэн найруулга/-ын 11 дүгээр зүйлд заасан авто замын судалгаа шинжилгээ, хөгжлийн асуудал эрхэлсэн байгууллагын чиг үүргийг гүйцэтгэж, долоон хэлтэстэйгээр үйл ажиллагаагаа хэрэгжүүлэн ажиллаж байна.
Авто замчид бид өнгөрсөн хугацаанд 20 аймгийг нийслэл хоттой хатуу хучилттай авто замаар холбож, 7000 гаруй км авто зам, 15000 гаруй у/м гүүрийг барьж, хурдны болон тусгай зориулалтын авто замыг бүтээн байгуулжээ. “Зам, тээврийн хөгжлийн төв” ТӨҮГ 2015 оноос хойш 1053 зураг төсөлд магадлал хийж, баталсан байна.
XXI зууны дэвшилтэт технологийн эрин үед салбар бүр ажиллах арга хэлбэр, техник технологийн нөхцөл байдлаа орчин үетэйгээ уялдуулах шаардлага тулгарч, үүний зэрэгцээ манай байгууллага ч мөн адил эрдэм шинжилгээ, судалгааны ажлыг эрчимтэй өрнүүлж, орчин үеийн техник технологийг үйл ажиллагаандаа нэвтрүүлэн салбарынхаа ирээдүйн ахиц дэвшлийн цар хүрээг улам өргөжүүлэхэд чин сэтгэлээр зүтгэж байгаа билээ.
Эрхэм авто зам хэрэглэгч, зорчигч та бүхэн манай вэб сайтаар дамжуулан “Зам, тээврийн хөгжлийн төв” ТӨҮГ-ын үйл ажиллагааны мэдээ, мэдээлэл, хэрэгжиж буй төсөл, хөтөлбөрүүд, шинээр нэвтрүүлж буй техник технологийн ололт амжилтын талаарх мэдлэг, мэдээллийг авч, санал хүсэлтээ ирүүлэхэд хэн бүхэнд нээлттэй байх болно.
Замчид, тээвэрчид, түмэн олны минь алтан шар зам өлзийтэй байхын ерөөлийг өргөе.
“Зам, тээврийн хөгжлийн төв” Төрийн өмчит үйлдвэрийн газрын захирал
Х.ПҮРЭВЖАРГАЛ
