Зам, тээврийн яамны Төрийн нарийн бичгийн дарга С.Батболд Кувейт Улстай Агаарын харилцааны тухай хэлэлцээр байгуулахаар тус улсад ажиллах үеэр Арабын Эдийн засгийн хөгжлийн Кувейтийн сангийн Ерөнхий захирлын албан үүргийг түр орлон гүйцэтгэгч Валийд Аль-Бахар-тай уулзав. Энэ үеэрээ одоо хамтран ажиллаж байгаа болон цаашид хэрэгжүүлэх төсөл хөтөлбөрүүдийн талаар санал солилцлоо.

Кувейтийн сантай Монголын зам тээврийн салбар 2002 оноос эхлэн хамтран ажиллаж байгаа бөгөөд 2002-2015 онуудад Кувейтийн сангийн санхүүжилтээр Дархан-Эрдэнэт, Эрдэнэт-Булган-Уньт,  Уньт-Тариалан чиглэлийн нийт 415 км авто зам барих төслүүдийг хэрэгжүүлсэн.

Монгол Улсын Засгийн газрын зүгээс Арабын эдийн засгийн хөгжлийн Кувейтийн сантай “Өндөрхаан нисэх онгоцны буудлын шинэчлэлтийн төсөлд зориулж 3.5 сая ам.долларын буцалтгүй тусламж олгох хэлэлцээр”-ийг 2018 онд байгуулан, Хэнтий аймгийн Өндөрхааны нисэх онгоцны буудлыг шинэчлэн барих төслийг хэрэгжүүлэн ажиллаж байна

Цаашид тус сантай Улаанбаатар хот–Шинэ Хархорум хот чиглэлийн 382 км авто замын төслийн бүрэлдэхүүн хэсэг болох Улаанбаатар-Лүн чиглэлийн 101.7 км авто замыг зургаан эгнээ болгон өргөтгөн шинэчлэх төслийг хамтран хэрэгжүүлэх ажил яриа, хэлэлцээрийн шатанд байгаа юм. Энэ талаар санал солилцож, төслийн нийт хөрөнгө оруулалтыг Катарын баялгийн сан, Дубайн хөрөнгө оруулалтын сан, Оманы хөрөнгө оруулалтын сан зэрэг Арабын бусад сангууд болон олон улсын хөрөнгө оруулалтын бусад байгууллагуудтай хамтран хэрэгжүүлэх чиглэлээр ажиллахаар тохиролцлоо.

Ерөнхий захирлын албан үүргийг түр орлон гүйцэтгэгч Валийд Аль-Бахар Кувейтийн сан бусад Булангийн зөвлөлийн хамтын ажиллагааны орнуудын сангуудтай байнгын холбоотой хамтран ажилладгийн хувьд төсөлд эдгээр сангуудын татан оруулах болон  төслийг бүрэн хэрэгжүүлж дуусгах тал дээр бүхий л дэмжлэг үзүүлэн ажиллахаа илэрхийлэв.

Зам, тээврийн яам