ЭМГЭНЭЛ

                 МОНГОЛ УЛСЫН ГАВЬЯАТ БАРИЛГАЧИН

                                   БАДАМЫН ЛУВСАН

                                           /1937-2020/

       Монгол улсын гавьяат барилгачин, ахмад замчин Бадамын Лувсан 2020 оны 9 дүгээр сарын 25-ны өдөр хүнд өвчний учир хорвоогийн мөнх бусыг үзүүлж, гэр бүл, үр хүүхэд, ах дүү, төрөл төрөгсөд, хамт олон, найз нөхдөд нь нөхөж баршгүй хүнд гарз тохиолоо.

 

Б.Лувсан нь 1937 онд Дорнод аймгийн Дашбалбар суманд төрсөн. 1962 онд Москва хотын Авто замын дээд сургууль төгсөж “Авто замын инженер” мэргэжил эзэмшиж ирснээс хойш Авто замын салбарт тасралтгүй 58 жил ажилласан.

            1962-1964 онд Завхан аймгийн Тосонцэнгэл суманд Идэрийн гол дээр Монголд  анх удаа 20 метрийн алгасалтай 76 метрийн урттай хадмал банзан гүүрийг чанарын онц  үнэлгээтэй бариулсан, 1964-1966 онд Улаанбаатар хотын төвийн зам барилга конторт ерөнхий инженер, 1966-1968 онд Замын хэрэг эрхлэх газарт үйлдвэр-техникийн хэлтсийн дарга, 1968-1975 онд Тээврийн яаманд Замын хэлтсийн дарга, 1975-1981 онд мөн яаманд Их барилга, замын хэлтсийн дарга, 1981-1989 онд Сайд нарын Зөвлөлийн дэргэдэх Авто замын ерөнхий газарт орлогч дарга, 1989-1990 онд Зам, тээврийн яамны орлогч сайд бөгөөд Авто замын газрын дарга, 1990-1991 онд Авто замын нэтгэлийн ерөнхий захирал, 1992-1995 онд Шинжлэх ухаан, үйлдвэрлэлийн “Авто зам” нэгдэлд эрдэм шинжилгээний ажилтан, 1995-1997онд Ахлах мэргэжилтэн, хэлтсийн дарга, Авто замын газарт 1997-1998 онд Үйлдвэрлэлийн хяналтын хэлтсийн ахлах мэргэжилтэн, 1998-1999 онд Зам ашиглалтын хэлтсийн дарга, ахлах мэргэжилтэн-улсын байцаагч, 1999-2000 Хяналтын инженер, 2000-2004 онд Зөвлөх, ажлын хэсгийн гишүүн, 2005 оноос  салбарын Ахмадын хорооны даргаар үр дүнтэй ажилласан.

Дэд бүтцийн салбарт Авто замыг хөгжүүлэх үйлст өөрийн мэдлэг авьяас, хүч чадлаа дайчлан олон жил бүр бүтээлтэй ажиллаж ирсэн Монголын авто замын хоёр дахь инженер юм.

 

Улсын хэмжээний бүх зам, гүүрийн бүртгэл мэдээллийн нэгдсэн санг бий болгосны дээр авто замын төлөвлөлтийн норм, засвар арчлалтын техникийн дүрэм, зааврууд Монгол улсын Авто замын тухай хууль, Авто замын хяналтын дүрэм зэрэг хууль эрхийн актуудыг боловсруулж гарахад идэвхитэй, үр бүтээлтэй оролцож ажилласны зэрэгцээгээр Мянганы сорил  сангийн хөрөнгөөр баригдсан Чойр-Сайншандын хатуу хучилттай замын барилгын ажил дээр оролцогчдын хорооны гишүүнээр  хяналт  тавьж ажилласан. Авто замын салбарын 70 жилийн түүхийг бичилцэж ном болгон гаргасан.

Монгол орныг замжуулах, Авто замын байгууллагын удирдлага  зохион байгуулалтыг боловсронгуй болгож үйлдвэрлэлийн баазыг бэхжүүлэх, боловсон хүчнээр хангах, замын санхүүжилтийн эх үүсвэрүүдийг бий болгож баталгаажуулах, авто замын техникийн бодлого, удирдлагын менежментийг боловсронгуй болгох, авто замын талаарх хууль эрхийн актуудыг боловсруулж гаргах, залуу үеийг сургаж бэлтгэхэд өндөр үр бүтээлтэй ажиллаж байсан учир 1971 онд Ардын хувьсгалын 50 жилийн ойн медаль, 1975 онд Хөдөлмөрийн хүндэт медаль, 1981 онд Ардын хувьсгалын 60 жилийн ойн медаль мөн “Онц тээвэрчин”, “Тэргүүний замчин”, Оросын Холбооны Улсын “Хүндэт замчин” тэмдгээр, 1997 онд Дэд бүтцийн хөгжлийн яамны Хүндэт дэвтэрт бичигдэж, 1987 онд Алтан гадас одон, 2001 онд Ардын хувьсгалын 80 жилийн ойн медаль, 2001 онд “Монгол улсын гавъяат барилгачин” цол, 2006 онд Их Монгол улс байгуулагдсаны 800 жилийн ойн хүндэт медаль, 2007 онд Монгол улсын “Тэргүүний барилгачин” тэмдэг, 2011 онд Ардын хувьсгалын 90 жилийн ойн медаль, 2019 онд Авто замын салбарын 90 жилийн ойн медалиар тус тус шагнагдаж байсан.

           

Талийгаачийн шулуун шударга, төлөв даруу, ажилч хичээнгүй, нөхөрсөг зан чанар, авто замын салбарын хөгжил дэвшилд оруулсан хувь нэмэр бидний сэтгэл зүрхэнд үүрд дурсагдах болно.

 

Талийгаачийн гэр бүл, үр хүүхэд, ах дүү, төрөл төрөгсөд, найз нөхөд, хамт олонд нь гүн эмгэнэл илэрхийлье.

       “ЗАМ, ТЭЭВРИЙН ХӨГЖЛИЙН ТӨҮГ

АВТО ЗАМЫН САЛБАРЫН АХМАДЫН ХОРОО