Мэндчилгээ
Монгол Улсад авто замын салбар үүсэж хөгжин 91 дэх жилийнхээ ойтой золгож байна. Энэ хугацаанд нэгээс бусад аймгуудыг нийслэл хоттой хатуу хучилттай авто замаар холбож 7000 гаруй км авто зам, 15000 гаруй урт метр гүүрийг барьж байгуулан, хурдны болон тусгай зориулалтын авто замыг бий болгож чадсан баялаг түүхийг манай орны авто замчид бүтээж чаджээ. Энэ бол Монгол Улсын Төрийн эрх барих дээд байгууллага Улсын Их Хурал, Засгийн газраас санаачлан хэрэгжүүлж ирсэн “Мянганы зам”, “Шинэ бүтээн байгуулалт” дунд хугацааны зорилтот хөтөлбөр зэрэг томоохон төсөл хөтөлбөрийн үр дүн юм. Эдгээр төсөл хөтөлбөрүүдийг хэрэгжүүлэхэд авто замчин хүн нэг бүрийн оюун ухаан, хичээл зүтгэл, нөр их хөдөлмөр шингэсэн байдаг.
Энэ их бүтээн байгуулалтын ажлыг олон арван жил хийж, бүтээхэд Монгол Улсын Авто замын салбарт хөрөнгийн эх үүсвэрээс эхлээд мэргэжилтэй боловсон хүчний нөөц, дадлага туршлага, техник тоног төхөөрөмж гээд учраагүй бэрхшээл, туулаагүй зовлон байгаагүй гэдгийг авто замчид бид дэндүү сайн мэднэ. Авто замчид та бүхэн маань өнгөрсөн баялаг түүхтэй ч ирээдүй биднээс хийснээсээ ихийг хийж, бүтээснээсээ илүүг бүтээж, салбарын хөгжлийг шинэ шатанд гаргахыг зүй ёсоор шаардаж байна.
Хөгжлийн шинэ шатанд гарахад манай хамт олон, бидний оруулах хувь нэмэр бол Авто замын сүлжээний бэлэн байдлын техник ашиглалтын түвшинг дээшлүүлэхийн тулд үндсэн хөрөнгийн менежмент, удирдлагын төлөвлөлтийг оновчтой болгож, удирдан зохион байгуулах, Эрдэм шинжилгээ судалгааны ажлын төлөвлөлт, өгөөжийг дээшлүүлэх, Стандарт норм, нормативын баримт бичгийн боловсруулалт, чанарыг сайжруулан эдгээр баримт бичгээр дамжуулан үйлдвэрлэл үйлчилгээг удирдах замаар авто замын барилга, засварын ажлын чанар, хүртээмжийг дээшлүүлэх явдал байх болно. Нийт авто замчид та бүхэндээ хийж бүтээх их үйлсэд нь өндөр амжилт хүсэж Монгол Улсад Авто замын салбар үүсэж хөгжсөний түүхт 91 жилийн ойн баярын мэндийг өргөн дэвшүүлье.
АЛТАН ШАР ЗАМЫН ӨЛЗИЙ БУЯН
ӨНӨ МӨНХӨД ИВЭЭХ БОЛТУГАЙ.
“Зам, тээврийн хөгжлийн төв” ТӨҮГ-ын
ЗАХИРАЛ Р.БУД
2020.10.30
