“Зам, тээврийн хөгжлийн төв” ТӨҮГ-ын Төлбөр авах үйл ажиллагааны хэлтсийн Төлбөр авах цэгийн ахлагч нар 2025 оны 6 дугаар сарын 12,13-ны өдрүүдэд энэ оны хагас жилийн ажлаа тайлагнаж байна.
Монгол улсын хэмжээнд нийт 33 төлбөр авах цэг үйл ажиллагаа явуулдаг. Тэнд төвлөрдөг мөнгөний тодорхой хувь нь манай орны авто замын засвар арчлалтад зарцуулагддаг юм. 2022 оноос эхлэн төлбөр авах цэгүүдийг цахимжуулах ажил эхэлж одоогоор 9 цэгийг цахимжуулаад байна. Цаашдаа бүх төлбөр авах цэгийг цахимжуулах ажил шат дараатайгаар хийгдэж байгаа юм.

“Зам, тээврийн хөгжлийн төв” ТӨҮГ-ын Захирал Д.Оюунболд Төлбөр авах цэгийн ахлагч нартай уулзах үеэрээ “Та бүхэн бол Монгол орны өнцөг булан бүрд “Зам, тээврийн хөгжлийн төв” гэж төрийн бодлого, шийдвэрийг хэрэгжүүлдэг, хяналт тавьдаг байгууллагын төлөөлөл болон ажиллаж байна. Та бүхний удирдлагад ажилладаг 200 гаруй хүн мөн манай байгууллагыг, Зам, тээврийн яамыг төлөөлөн ажиллаж байна. Гэрээт ажилтан гэдэг хариуцлагаас ангид гэсэн үг биш, та бүхний өмсөж буй ажлын хувцас, сууж буй ширээ, сандал, ажлын байр бүгд төрийн өмч. Тиймээс төрийн нэрийн өмнөөс ажиллаж байгаагаа ухамсарлаж, хариуцлагатай, сэтгэлтэй ажиллаарай. Алдаа дутагдал байвал давтах биш засаад явах учиртай. Хүлээсэн үүрэгтээ хариуцлагатай ханд, бид бас хариуцлага нэхэх болно…

Бүх төлбөр авах цэгүүдийг цахимжуулах ажил хийгдэж байна. Ингэснээр улсад төвлөрүүлдэг мөнгөн дүн өсөж дагаад та нарын цалин хөлс ч нэмэгдэж, нийгмийн асуудал шийдвэрлэгдэх боломжтой” гэсэн юм.
Ахлахууд байгууллагын захирал болон удирдах албан тушаалтнуудад орон нутгийн төлбөр авах цэгүүдэд тохиолддог бэрхшээл, шийдвэрлүүлэх шаардлагатай асуудлуудыг хөндөн ярилаа.

Мөн энэ үеэр ахлахуудад “Зам, тээврийн хөгжлийн төв”-ийн Хөдөлмөрийн аюулгүй байдал, эрүүл ахуйн мэргэжилтэн, Хууль, гэрээний мэргэжилтэн, Хүний нөөцийн мэргэжилтэн нар сургалт, зөвлөмж өгсөн бол Авлигатай тэмцэх газрын комиссарууд Авлигаас урьдчилан сэргийлэх, соён гэгээрүүлэх сургалт, программ хангамжийн инженерүүд төлбөр авах цэгийн цахим системийн тухай тайлбарлан таниулсан юм.