“Зам, тээврийн хөгжлийн төв” төрийн өмчит үйлдвэрийн газар нь Монгол Улсын Засгийн газрын 2015 оны 2 дугаар сарын 9-ний өдрийн 55 дугаар тогтоолоор байгуулагдсан бөгөөд Төрийн өмчийн бодлого, зохицуулалтын газрын 2025 оны 29 дүгээр тогтоолоор шинэчлэн батлагдсан дүрмийн хүрээнд үйл ажиллагаагаа явуулж байна. Тус байгууллага нь Монгол Улсын “Авто замын тухай” хууль (шинэчилсэн найруулга)-ийн 11 дүгээр зүйлд заасан чиг үүргийн хүрээнд болон Засгийн газраас зам, тээврийн салбарт баримталж буй бодлого, шийдвэрийг хэрэгжүүлэн ажилладаг. Олон улс болон улсын чанартай авто зам, замын байгууламжийн ашиглалтын бэлэн байдлыг мэргэжлийн стандартад нийцүүлэх зорилгоор судалгаа, шинжилгээ хийж, хөгжлийн зорилтот үйл ажиллагааг эрхлэн гүйцэтгэж буй үндэсний мэргэшсэн байгууллага юм.

      Монгол Улсын Засгийн газрын бодлого, Төрийн өмчийн бодлого, зохицуулалтын газрын чиглэлийн дагуу тус газар нь чиг үүргийн давхардлыг арилгах, бүтцийн оновчлол хийх хүрээнд 17 албан хаагчийг чөлөөлж, нийт 107 орон тоонд шинэ томилгоог зогсоож, Төрийн хэмнэлтийн тухай хуулийг хэрэгжүүлэн ажиллаж байна. Мөн тус газар нь томоохон бүтээн байгуулалт, авто зам, замын байгууламжийн барилга, засварын ажилд техник технологийн хяналт, захиалагчийн хяналтыг хэрэгжүүлэх үүднээс шаардлагатай хүний нөөцийг түр хугацааны гэрээгээр ханган ажиллуулж байна.